Pîrozbahiya Cejna Newrozê ya Mêrsînê tevî barîna baranê jî bi coşeke mezin hate pîrozkirin. Bi hezaran kes hêj ji saetên serê sibehê ve li Qada Tirmilê ya navçeya Akdenîzê kom bûn. Piraniya welatiyan cilûbergên Kurdî li xwe kiribûn û qada pîrozbahiyê bi rengên kesk, sor û zer xemilandin. Li qadê gelek caran dirûşma “Bijî Serok Apo” olan da û welatiyan govend gerand. Pîrozbahî, bi rêzgirtinê dest pê kir. 

 

Hevberdevkên Komîteya Amadekar a Newrozê piştî silavkirina gel, peyamên hatine şandin xwend. Piştî xwendina peyama girtiyên li zindanên Herêma Çukurovayê, peyama Rêberê Gelê Kurd Abdullah Ocalan a ji bo Newrozê hate xwendin. Di dema xwendina peyamê de bêdengiyeke mezin li qadê serwer bû. Di pîrozbahiyê de posterên Abdullah Ocalan, Mazlum Dogan, Zekiya Alkan û kadroyên din ên pêşeng hatin hilgirtin. 

 

AGIRÊ NEWROZÊ HATE HILKIRIN 

 

Piştre agirê Newrozê hate hilkirin û girseyê bi yek dengî dirûşmên “Jin, jiyan, azadî” û “Bê Serok jiyan nabe” berz kir. Piştre jî aktivîsta TJA’yê Sara Kaya axivî û hemû girtiyên siyasî silav kir. Sara Kayayê got: “Em dixwazin di Newroza sala pêş de Rêberê xwe (Abdullah Ocalan) di nav gel de bibînin.” 

 

Piştre jî hunermendên herêmî derketin ser dikê û stranên xwe gotin. 

 

BANGA 27’Ê SIBATÊ

 

Serokwekîla Koma DEM Partiyê Gulistan Kiliç Koçyîgît jî di pîrozbahiyê de axivî û silav ji Îmraliyê re şand û Newroza Abdullah Ocalan pîroz kir. Gulistan Kiliç Koçyîgîtê, anî ziman ku gelê Kurd piştgiriyê dide Banga 27’ê Sibatê û Kurd jiyaneke azad, demokrtîk û aştiyane dixwazin. 

 

‘DEMA EM LI BENDÊ BISEKININ NÎNE’

 

Di berdewamê de Gulistan Kiliç Koçyîgîtê îşaret bi Pêvajoya Aştî û Civaka Demokratîk kir û ev tişt anî ziman: “Birêz Ocalan di vê pêvajoyê de her tişta hewce dikir kir. Niha li Rojhilata Navîn dîsa şer heye û divê Meclis tavilê gavan biavêje. Dema em li bendê bisekinin nîne. Divê bingeha qanûnî ya pêvajoyê tavilê bê avakirin. Hewceyd deriyên zindanan bên vekirin, hevalên me yên li sirgunê bikarin vegerin. Divê qeyûman paşve bikişînin. Hewceye em li her çar parçeyan bibin yek. Em naxwazin salek piştre dîsa li qadan peyamên birêz Ocalan bixwînin. Em dixwazin wî bi xwe li van qadan bibînin. Divê deriyên Îmraliyê tavilê bên vekirin. Êdî ev rastiyeke ku nabe were taloqkirin.” 

 

Piştî axaftinan, hunermend Rûken Yilmaz derket ser dikê. Pîrozbahî, bi gerandina govendê bi dawî bû.